नीजि लगानीबाट पाँच किलोमिटर मोटरबाटो निर्माण

राम योङ्हाङ
 पश्चिीमी इलामको इभाङ्ग–४ का बासिन्दाले सरकारको मुख नताकी आफ्नै नीजि
लगानी गरेर नै पाँच किलोमिटर ६७ मिटर मोटरबाटोे निर्माण गरेका छन् ।
पर्यटकीय स्थल माङ्गमालुङ्गदेखि–भोटेडाँडा–गाविस भवन हुँदै गजुरमुखी धाम
जोड्ने निर्माणधीन पर्यटन मार्गमा पर्ने भोटेडाँडादेखि सिरिसे टोलसम्म
मोटरेबल बाटो नीजि रकम खर्च गरेर निर्माण गरेका हुन् ।
गाउँबाट नजिकका क्षेत्रमा यातायातको सुविधा भएपनि आफ्नो गाउँमा बाटो
नभएका कारण उत्पादित कृषिजन्य बस्तु ओसारप्रसार गर्न र भैपरी आउने दुःख
विराम पर्दा समेत डोको र स्टेचरकै भरमा जिउनुपर्ने बाध्यता खेप्दै आएका
यहाँका बासीन्दाले पाँच हजार देखि ३० हजारसम्म चन्दा संकलन गरेर स्काभेटर
प्रयोग गरी बाटो निर्माण गरेका हुन । उनीहरुले ७५ जना उपभोक्ताबाट कुल
सात लाख ५१ हजार रुपैँया जम्मा गरेर बाटोमा खर्चेका छन् ।
बाटो निर्माणका लागि १८ जना उपभोक्ताले १० हजारदेखि ३० हजार सम्म नगद
उपलब्ध गराएका थिए । बाटो निर्माणका लागि स्थानीय ठाकुरसिंह राईले ३०
हजार, देशबहादुर राईले २५ हजार, अम्बिका प्रसाद राई, अरुण राई र
मनबहादुर राईले १६÷१६ हजार रुपैँया र केन्द्रप्रसाद राईले १२ हजार रुपैँया
नगद निर्माण समितिलाई उपलब्ध गराएका थिए । त्यसैगरी १२ जना उपभोक्ताले
१०÷१० हजारका दरले रकम उपलब्ध गराउनुभएको थियो । स्थानीय देउकुमार राई,
अशोक राई, धनप्रसाद राई, मनीप्रसाद राई, शेरबहादुर राई, पञ्चमाया राई,
मनीकुमार राई र रुद्र लिम्बू, डिल्ली लिम्बू, यामबहादुर लिम्बू, इच्छाबहादुर
लिम्बू र हर्कराज लिम्बूले १०÷१० हजारका दरले रकम उपलब्ध गराउनुभएको निर्माण
समितिका सचिव अम्बिकाप्रसाद राईले जानकारी दिनुभयो । त्यस्तै अन्य ५७ जना
उपभोक्ताबाट पाँच हजारदेखि नौ हजार नौ सय रपैँयासम्म रकम प्राप्त भएको
राईले बताउनुभयो ।
बाटो निर्माणका लागि सम्बन्धित निकायमा पटक–पटक माग गर्दा समेत कुनै
सुनुवाई नभएपछि गाउँमा नमुनाको रुपमा काम गरेर देखाउन आफरुसँग भएको
जायजेथा र अन्नपात समेतको बिक्री गरेर तथा ऋण समेत गरेर बाटोमा लगानी
गरेको उपभोक्तहरुले बताएका छन् । “बाटो निर्माणका लागि माग गर्दै गाउँ
विकास समिति र जिल्ला विकास समितिमा हामी धेरै पटक गयौँ, कसैले चासो
दिएन, बाटो बन्ने कुनै छाँटकाटँ पनि देखिएन । त्यसपछि सिङ्गो गाउँ नै लागेर
बाटो निर्माणगरेका हौँ ।” निर्माण समितिका अध्यक्ष अरुण राईले
बताउनुभयो ।
अहिले गाउँमा बाटो निर्माण भएपछि सो गाउँका बासिन्दाहरु आफूहरुलाई
आवश्यक पर्ने दैनिक उपभोग्य तथा कृषिजन्य सामानहरु ओसार पसार गर्न सहज
भएको बताउँछन् । यसरी अरुको मुख नताकी नै गाउँमा बाटो निर्माण भए पछि
सवै मिले गाउँमा चाडैँ नै विकास गर्न सकिँदो रहेछ भन्ने राम्रो उदाहरण
सो गाउँका बासिन्दाले दिएका छन् ।

Posted in: समाचार