झापा बन्यो पूर्वाञ्चल च्याम्पियन

राम योङ्हाङ
इलाम, ३ फागुन ।
इलामको ठूलो टुँडीखेलमा सञ्चालित पूर्वाञ्चल क्षेत्रीय स्तरीय पुरुष छनौट फुटबल प्रतियोगिताको फाईनल खेलमा झापा विजयी हुँदै पूर्वाञ्चल च्याम्पियन बनेको छ । आज सम्पन्न फाईनल खेलमा सुनसरीलाई ३–१ को गोल अन्तरले हराउँदै झापा पूर्वाञ्चल च्याम्पियन बनेको हो ।
सुनसनीपूर्ण प्रतिष्पर्धामा खेलको मध्यान्तर अघिको १७ आँै मिनेटमा झापाका कप्तान प्रवेश कट्वालले पाएको बललाई गोलमा परिणत गर्दै आफ्नो टिमको तर्फबाट पहिलो गोलको खाता खोलेका थिए । त्यसपछि २९ औ मिनेटमा सुनसरीका दिबहादुर तामाङले झापाका दिपेन राईलाई डिबक्स भित्रै लडाएपछि झापाले पेनाल्टीको अवसर पाएको थियो । झापाले पाएको पेनाल्टीको अवसरलाई दिपेन राईले गोल गर्दै आफ्नो टिमलाई २–० को अन्तरमा अग्रता दिलाए ।
मध्यान्तर पछिको खेलमा खेलको ६२ औँ मिनेटमा झापाका प्रवेश कट्वालले फेरी अर्को गोल गर्दै टिमको अग्रतालाई ३–० को अन्तरमा पुर्याउँदै जीतलाई निरन्तरता दिलाएका थिए । उता सुनसरीका तर्फबाट भने मध्यान्तर पछि खेलको ७४ औँ मिनेटमा लिले मगरले एक मात्र सान्तवना गोल फकार्उन सफल भएका थिए । खेलमा ७४ औ मिनेटमा सुनसरीका गोल रक्षक विनय श्रेष्ठ घाईते समेत भएका थिए । श्रेष्ठको स्थानमा हेम गुरुङलाई खेलाईएको थियो ।
दुबै टिममा राष्ट्रिय ए डिभिजनका क्लबहरुमा खेल्ने खेलाडीहरुको बाहुल्यता रहेकाले दुबै टीमले आफ्नो प्रतियोगितामा आफ्नो जीत हुने दावी गर्दै आएका थिए । खेल अहिलेसम्मकै उत्कृष्ठ र रोमाञ्चक भएको दर्शकहरुले प्रतिक्रिया दिएका छन् । खेलको अवलोकन गर्न गाउँ गाउँबाट हज्जारौँ दर्शकहरु आएका थिए । खेलमा झापाका तीन जना र सुनसरीका दुई जनाले पहेँलो कार्ड पाएका थिए । प्रतियोगतामा विजेता टिमका खेलाडीहरुलाई मेडल र प्रमाणपत्र प्रदान गरिएको थियो ।
पूर्वाञ्चल क्षेत्रीय खेलकुद विकास समितिको आयोजना तथा जिल्ला खेलकुद विकास समिती इलाम र जिल्ला फूटबल संघ इलामको संयोजनमा भएको प्रतियोगिता गत माघ २६ गतेदेखि सञ्चालन हुँदै आएको थियो । धनगडीमा आगामी फागुन १३ गतेदेखि सञ्चालन हुने राष्ट्रिय खेलकुद प्रतियोगिताका लागि खेलाडी छनौट गर्न आयोजित प्रतियोगितामा पूर्वाञ्चलका सोलुखुम्बू बाहेकका १५ जिल्लाका फूटबल टीमको सहभागीता रहेको थियो ।
यसैबीच आजै भएको जिल्ला फूटबल संघ इलाम र खेलकुद विकास समितिको संयुक्त टीम र नेपाल पत्रकार महासंघ इलामबीच भएको मैत्रीपूर्ण फूटबल खेलमा आयोजक विजयी भएको छ । आयोजकले पत्रकार महासंघको टीमलाई २–० को गोल अन्तरले पराजीत गरेको थियो ।

Posted in: खेल- समाचार