वडा नागरीक मञ्चद्वारा खेलमैदान निर्माण

राम योङ्हाङ
इलामको इभाङ ५ मा गठन गरिएको वडा नागरीक मञ्चले स्थानीय एक विद्यालयको खेलमैदान पुनःनिर्माण, मर्मत र स्तरोन्नती गरेको छ । स्थानीय शासन तथा सामुदायिक विकास कार्यक्रम (एलजीसीडीपी) अन्र्तगत सञ्चालन भईरहेको सामाजिक परिचालन कार्यक्रमको शिलशिलामा गठित मञ्चले जनसहभागिता जुटाएर खेलमैदानको मर्मत, विस्तार र स्तर उन्नती गरेको हो । समाज विकासका लागि नयाँ काम गरौँ भन्ने अभियान अन्र्तगत मञ्चले स्थानीय सिंहदेवी प्राथमिक विद्यालयको खेलमैदानको पुनःनिर्माण, मर्मत र स्तरोन्नती गर्न श्रमदान जुटाएको हो । श्रमदान कार्यक्रममा मञ्चले स्थानीयको समेत जनसहभागिता जुटाएको थियो । सो कार्यक्रममा मञ्चका पदाधिकारी र स्थानीय समेत गरी ३८ जनाले श्रमदान गरेको मञ्चका संयोजक धनजीत राईले जानकारी दिनुभएको छ । जिल्ला विकास समिति इलाम र मानव अधिकार मञ्च नेपाल इलामको साझेदारीमा इभाङ्गमा भईरहेकोे कार्यक्रम अन्र्तगत गठित मञ्चले इभाङ्गमा यस्ता विविध कार्यक्रमहरु सञ्चालन गरिरहेको छ ।

Posted in: समाचार