सत्ता,कुर्सी र नेता

उत्तम रिजाल
त किन चुप छस हँ ? तेरो मुख खोलिन्न अब पनि ?के त अझै पनि टुलुटुलु हेरिरहन्छस् ?उठ्दैनस तँ ?यहि कोख हैन तैले बास गरेको ?अनि यहि लाम्टो होईन तैले चुसेको ? आज नेपाल आमा यहि भनिरहेकी छन् आफ्ना सन्तान संग । वीर गोर्खालीको रगतले सोधिरहेको छ । के हाम्रा सन्तान होईनौ तिमीहरु ? माया छैन आफ्नो राष्ट्रियताको ? किन तिलान्जली दिदैछौ आफ्नो राष्ट्रियता, सत्ता र कुर्सीका लागी । अनि मलाई पनि लागिरहेछ । म कहाँ छु ?म कुन देशमा छु ?कतै म सपना त देखिरहेको छुईन ? के भईरहेको छ हँ ? सायद तपाई लाई पनि यस्तै भैरहेको होला,अनि तपाइको मनले पनि यहि भनिरहेको होला, यदि नेपाली हुनुमा गर्व गर्नु हुन्छ भने । त्यसैले नेपाल आमाको आँसु पुस्नका लागी आजै देखि हामी गोर्खालीका सन्तान एक हुन्नौ भने न तपाइ रहनु हुन्छ न म,नत गोर्खालीको स्वाभिमान नै ।
वीर गोर्खालीको देश हो यो । अनि उनैका सन्तान हौ हामी । तर सत्ता र कुर्सीका लागी तिनै वीर पुर्खाहरु लाई भुलेर पुर्खाको स्वाभिमान बेचिरहेका छन् नेताहरु । उनीहरुलाई सत्ता र कुर्सी भन्दा अरु केहिपनि चाहिन्दैन भन्ने प्रष्ट छ । नेपाली हुनुमा गर्व गर्ने जनता पनि छन् है देशमा भन्ने समेत नसोच्ने यि नेताहरु लाई मान्नु पर्छ भन्ने केहि छैन् । हामीले नै हो नेता बनाएको अनि हाम्रो भोटले नै हुन उनिहरु सभासद भएका पनि । जनतालाई पटक–पटक ढाँट्ने र ब्रिटिस साम्राज्य लाई घुँडा टेकाउने वीर गोर्खालीको पहिचान दौरा–सुरुवाल र विश्वको सर्वोच्च शिखर सगरमाथाको प्रतिक नेपाली टोपी लाई तिलान्जली दिने राष्ट्रघाति नेताहरु लाई अब सत्तामा बसिरहने नैतिक अधिकार छैन् । साच्चै भन्ने हो भने ।
दौरा–सुरुवाल,नेपाली टोपी अनि राष्ट्रिय झण्डा जलाइयो । म यो देशको नागरिक हुँ,म नेपाली हुँ,मेरो देश नेपाल हो भन्नेले आफ्नै देशको झण्डा जलाउन सक्छ ? सोच्नुस त ? आफ्नै जन्मदिने आमा लाई बलात्कार गरेजस्तै भएन र यो ? के तपाई आफ्नी आमा लाई बलात्कार गर्न सक्नु हुन्छ ? सक्नु हुन्न । यदि तपाइ बास्तविक छोरो हो भने सक्नु हुन्न । दौरा–सुरुवाल कुनै एक जाति विशेषको पहिचान होईन् । न त मेरो बाउ बाजेको । तपाई हाम्रो बाउ बाजे जन्मनु भन्दा अगाडि देखिनै प्रयोग गरिएको पोशाक हो यो । अझ भन्नु पर्दा अहिले जति पनि नेपाली नागरिकता बोक्ने छौ नि हामी सबै जन्मनु भन्दा अगाडी देखिनै नेपालीहरुले लगाउदै आएको पोशाक हो यो । मेरो कुनै रक्त सम्बन्ध जोडिएका बुबा,हजुरबा,कुप्राबा,जिजुबा कसैले स्थापित गरेको पोशाक पनि होईन् । तरपनि म दौरा–सुरुवालको वकालत गर्छु । किनकी जुन देशमा मैले जन्म लिएको छु , जुन माटोमा मैले पाईला टेकेको छु , यो देशको निर्माण गर्ने ति वीर पुर्खाहरुले प्रयोग गरेको भेष हो यो । विश्वको सर्वोच्च शिखर माथि विजय प्राप्त गर्ने वीर बलभद्र कँुबर,अमरसिंह थापा,काजी कालु पाण्डे,अभिमानसिंह बस्नेत,माथबरसिंह थापा,वीर भक्ती थापा,दामोदर पाण्डे, पृथ्वीनारायण शाहा लगायत वीर सपुतहरुले प्रयोग गरेको भेष हो यो । पुर्खाको पहिचान हो यो । गोर्खालीको इज्जत हो यो । अनि नेपालीको शान हो यो । तर आज तिनै पुर्खाको पहिचान, गोर्खालीको स्वाभिमान र नेपालीको शान लाई तिलान्जली दिएका छन् नेता भनौदा कुर्सीका भोकाहरुले । यतिमात्र होईन, सदनमा हिन्दी भाषा प्रयोग गरिन्छ । जुन नेपालमा बस्ने कुनैपनि जातिको मातृभाषा होईन । हो त भारतको राष्ट्रिय भाषा । तरपनि किन प्रतिबन्ध लगाउदैनन् सदनमा हिन्दी भाषाको प्रयोग लाई । यसबाट पनि प्रष्ट हुन्छ कि यि नेताहरुलाई पुर्खाको स्वाभिमान,वीर गोर्खालीको पहिचान र नेपालीको शान भन्दा पनि कुर्सी प्यारो छ । तसर्थ पुर्खाको स्वाभिमान,गोर्खालीको पहिचान र नेपालीको शान लाई जीवित राख्नका लागी अनि राष्ट्रियता बचाउनका लागी नेपाली हुनुमा गर्व गर्ने आम नेपाली जनताहरु एक हुन आवश्यक छ । अन्यथा बाँकी रहेको वीर गोर्खालीको देश नेपालको नाम पनि बदल्ने छन् , यि राष्ट्रघाती,डरपोक,काँतर, सत्ता र कुर्सीका भोकाहरुले । त्यसैले सम्पुर्ण गोर्खालीका सन्तानहरु आजै देखि उठौ,जागौ ढिलो नगरौ पुर्खाको रगतले सिंचिएको यो माटोको रक्षाका लागी । नत्र भने हामी गोर्खे कुनै दिन रातारात शरणार्थी बन्नेछौ गोर्खालीकै देशमा । सबैलाई चेतना भया ।

Posted in: लेख-रचना